लवकरच उरण-पागोटे एसटी बस सेवा
विद्यार्थी, ग्रामस्थांना होणाऱ्या त्रासाची दखल
उरण : उरण आगारातील एसटी बस पागोटे गावाजवळून सोडण्यात यावी, अशी मागणी पागोटे ग्रामपंचायत मार्फत १५ मार्च २०२३ रोजी निवेदनाद्वारे करण्यात आली होती. त्यांनंतर पागोटे एसटी बस सुरु करण्याच्या मागणीचा पागोटे ग्रामपंचायत द्वारे सातत्याने पाठपुरावा करण्यात येत होता. अखेर पागोटे ग्रामपंचायतच्या मागणीला आता यश प्राप्त झाले असून, येत्या काही दिवसातच उरण आगाराच्या एसटी बसेस पागोटे गावाजवळून जाणार आहेत. त्यामुळे प्रवाशी वर्गाला खूप मोठा दिलासा मिळणार आहे.
पागोटे गावासाठी उरण एसटी आगारातर्फे बस सेवा चालू करण्यात आली होती. परंतु, काही कारणास्तव पागोटे एसटी बस पाच ते सहा वर्षापूर्वीच बंद करण्यात आली. पागोटे, कुंडेगाव, नवघर या गावातील शाळकरी विद्यार्थी पुढील शिक्षणाकरिता फुंडे हायस्कूल आणि इतर शाळांमध्ये जात असून, त्यांना बससेवेचा उपयोग होत होता. सदर शाळेचे अंतर चार ते पाच किलोमीटर असल्याने विद्यार्थ्यांना आता चालत प्रवास करावा लागत आहे. पागोटे गावाशेजारी मोठ-मोठे कंटेनर यार्ड वसल्याने कंटेनर वाहनांची वर्दळ जास्त असून, पायी प्रवास करणारे विद्यार्थी-विद्यार्थिनी, ग्रामस्थ आणि नोकरी निमित्त इतर ठिकाणी जाणारा नोकर वर्ग यांना आपला जीव मुठीत धरुन प्रवास करावा लागत आहे. नवघर गाव ते नवघर फाटा दरम्यान पूर्वी चालू असलेला रस्ता आत्ता रेल्वेच्या कामामुळे बंद केल्याने पागोटे, कुंडेगाव येथील शाळकरी विद्यार्थी, ग्रामस्थ आणि नोकर वर्ग यांना नवघर गावाजवळील ब्रिजवरुन वळसा घालून शाळेत आणि इतर गावात जाण्याकरिता एसटी मधून प्रवास करण्यासाठी नवघर येथील बस स्टॉप येथे जावे लागत असल्याने त्यांना नाहक त्रास सहन करावा लागत आहे. शाळकरी विद्यार्थी, ग्रामस्थ आणि नोकरदार यांना होणाऱ्या त्रासाची दखल घेऊन त्यांचा प्रवास सुखमय होण्यासाठी खोपटा, आवरे, चिरनेर भागात जाणाऱ्या एसटी बसेस पागोटे गावाकडून वळवून मार्गस्थ केल्यास शाळकरी विद्यार्थी, ग्रामस्थ आणि नोकरदार यांची प्रवासाची मोठी समस्या दूर होणार असल्याने पागोटे गावाकरिता सकाळी ७, ११ आणि संध्याकाळी ५ या वेळेनुसार एसटी बस सेवा चालू करण्यात यावी, अशी मागणी पागोटे ग्रामपंचायत मार्फत करण्यात आली होती. आता या मागणीला यश आले आहे. नुकतेच ‘पागोटे ग्रामपंचायत'चे सरपंच कुणाल पाटील आणि पागोटे ग्रामस्थांनी उरण एसटी बस आगार प्रमुख सतीश मालचे यांची भेट घेतली. या भेटीत लवकरच पागोटे गाव येथे एसटी बस सुरु करण्यात येईल, असे आश्वासन उरण एसटी बस आगार प्रमुख सतीश मालचे यांनी सरपंच कुणाल पाटील आणि ग्रामस्थांना दिले.
