जलतरणपटू ११ वर्षीय मयंक म्हात्रे याचा विक्रम
उरण : करंजा येथील जलतरणपटू मयंक म्हात्रे याने घारापुरी बंदर ते करंजा जेट्टी असे सागरी १८ कि.मी. अंतर निर्धारित वेळेपेक्षा कमी वेळेत पोहून पार करत पुन्हा एकदा नवा इतिहास घडविला आहे. मयंकने ३ डिसेंबर २०२३ रोजी धरमतर ते करंजा असा प्रवाह पोहून पार केला होता. ज्यामुळे तो सदरचा प्रवाह पोहून जाणारा पहिला जलतरणपटू ठरला होता. तर यावेळी घारापुरी ते करंजा जेट्टी प्रवाह पोहून जाणारा मयंक पहिला जलतरणपटू ठरला असून, त्याने या निमित्ताने नवा इतिहास रचला असल्याचे त्याच्या प्रशिक्षकांकडून सांगण्यात आले.
उरण मधील सेंट मेरीज कॉन्व्हेट शाळेतील इयत्ता सहावी मध्ये शिकणारा मयंक उत्कृष्ट जळतरणपटू असून, समुद्रीय जलतरण त्याचा आवडता प्रकार आहे. मयंकने आजवर अनेक स्पर्धांमधून यश संपादन केले आहे. मात्र, समुद्रीय जलतरण त्याला मोठे यश आणि प्रसिध्दी देणारे ठरले आहे. समुद्रकिनारी लागून असणाऱ्या करंजा, कोंढारीपाडा येथे राहणाऱ्या या ११ वर्षीय चिमुकल्याने नवा विक्रम केला आहे. २ डिसेंबर रोजी मध्यरात्री १ः०४ मिनिटांनी मयंकने जगविख्यात घारापुरी बंदर येथून समुद्राच्या लाटांना आव्हान देत करंजा जेट्टी गाठली आणि पुन्हा एकदा नवा विक्रम प्रस्थापित केला. सागरी १८ कि.मी. अंतर त्याने निर्धारीत वेळेपेक्षा अर्धातास आधी पोहून पूर्ण केले आहे.
सदर प्रवाह पोहून जाण्यासाठी ६ तासाचा अवधी अपेक्षित होता. तर मयंकने हेच अंतर ५ तास २९ मिनिटात पोहून पार केले आहे. त्याने केलेल्या या प्रयत्नाने घारापुरी ते करंजा हा प्रवाह पोहून पार करणारा तो पहिला जलतरणपटू ठरला आहे. याच प्रमाणे मागील वर्षी याच दिवशी म्हणजे ३ डिसेंबर रोजी त्याने धरमतर ते करंजा असे १८ कि.मी. अंतर पोहून पार करत तो प्रवाह पोहून पार करणारा पहिला जलतरणपटू म्हणून आपले नाव कोरले आहे.
मयंकने केलेल्या विक्रमनंतर अनेकांनी शुभेच्छा दिल्या. मयंकचा सत्कार ‘शेकाप'चे युवा नेते प्रितम म्हात्रे यांच्या हस्ते करण्यात आला. यावेळी ‘महाराष्ट्र हौशी जलतरण संघटना'चे रायगड जिल्हा अध्यक्ष राजू कोळी, निरीक्षक शैलेश सिंग, समाजसेवक सचिन डाऊर, नितीनभाऊ कोळी यांच्यासह अनेक मान्यवरांची उपस्थिती यावेळी लाभली होती. मयंकने आपल्या यशाचे संपूर्ण श्रेय आई-वाडील, मार्गदर्शक किशोर पाटील, प्रशिक्षक हितेश भोईर यांना दिले आहे. त्याला ‘उरण तालुका हौशी जलतरण संघटना'चे सचिव सुनील पाटील, मनोहर टेमकर, जलतरणपटू जयदीप सिंग, आर्यन मोडखरकर, वेदांत पाटील, रुद्राक्षी टेमकर, आर्य पाटील यांचे सहकार्य लाभले.
