नवी मुंबई महापालिका आयुक्त निवासस्थान पत्त्यावर १५० मतदारांची नोंद
‘नवी मुंबई मेट्रो'चे २० जानेवारी पासून सुधारित वेळापत्रक
नवी मुंबई : ‘सिडको'च्या बेलापूर ते पेंधर या मेट्रो मार्ग क्र.१ वर २० जानेवारी २०२५ पासून ‘मेट्रो'च्या फेऱ्यांचे सुधारित वेळापत्रक लागू होणार असून सकाळी आणि सायंकाळी सर्वाधिक गर्दीच्या वेळी दर १० मिनिटांनी मेट्रो धावणार आहे. ‘मेट्रो'च्या फेऱ्यांमध्ये वाढ झाल्याने गर्दीच्या वेळी प्रवास करणाऱ्या प्रवाशांना याचा लाभ होणार आहे.
‘सिडको'तर्फे नवी मुंबई मेट्रो रेल्वे प्रकल्पांतर्गत मेट्रो मार्ग क्र.१ बेलापूर ते पेंधर विकसित करण्यात आला आहे. या मार्गावर १७ नोव्हेंबर २०२३ पासून मेट्रो सेवेचे परिचालन सुरू झाले असून या मेट्रो सेवेला प्रवाशांचा उत्तम प्रतिसाद लाभत आहे. सीबीडी-बेलापूर परिसर, तळोजा औद्योगिक क्षेत्र आणि ‘सिडको'च्या गृहसंकुलांना या मेट्रो मार्गाद्वारे उत्तम कनेक्टिव्हिटी लाभली आहे.
सर्वाधिक गर्दीच्या वेळी प्रवास करणाऱ्या प्रवाशांना वाढीव मेट्रो फेऱ्यांचा लाभ व्हावा याकरिता सदर मार्गावर २० जानेवारी पासून मेट्रो फेऱ्यांचे सुधारित वेळापत्रक लागू करण्यात येणार आहे. सुधारित वेळापत्रकानुसार बेलापूर आणि पेंधर स्थानकांतून सकाळी ६ वाजल्यापासून मेट्रो सेवा सुरु होणार आहे. बेलापूर येथून रात्री १० वाजता आणि पेंधर येथून रात्री ९.४५ वाजता ‘मेट्रो'ची शेवटची फेरी धावणार आहे. सर्वाधिक गर्दीच्या वेळेत बेलापूर येथून सकाळी ७.३० ते १० आणि सायंकाळी ५.३० ते ८ तर पेंधर येथून सकाळी ७ ते ९.३० आणि सायंकाळी ५ ते ७.३० दरम्यान दर १० मिनिटांनी ‘मेट्रोे'ची फेरी होणार आहे. सर्वाधिक गर्दीच्या वेळा वगळता उर्वरित वेळांमध्ये बेलापूर आणि पेंधर येथून दर १५ मिनिटांनी मेट्रो धावणार आहे.
