नवी मुंबई महापालिका आयुक्त निवासस्थान पत्त्यावर १५० मतदारांची नोंद
पनवेल महापालिका हद्दीतील राजिप शाळांचे ‘महापालिका'कडे लवकरच हस्तांतरण
शाळांना मिळणार नवसंजीवनी ; विद्यार्थ्यांना सुलभ शिक्षण
पनवेल : पनवेल महापालिका हद्दीतील सर्व रायगड जिल्हा परिषद शाळांचे हस्तांतर पनवेल महापालिकेकडे करण्यासाठी योग्य ती कार्यवाही करण्याचे आदेश राज्याचे ग्रामविकास मंत्री गिरीष महाजन यांनी नागपूर येथे संबंधित अधिकाऱ्यांना दिले.
पनवेल महापालिका हद्दीतील सर्व रायगड जिल्हा परिषदेच्या शाळांचे हस्तांतर पनवेल महापालिकेकडे विनामोबदला करण्यासंदर्भात आमदार प्रशांत ठाकूर यांनी निवेदन देऊन बैठक आयोजित करण्याची मागणी केली होती. त्या अनुषंगाने नागूपर येथे विधानभवनात सदर बैठक ना. गिरीश महाजन यांच्या अध्यक्षतेखाली पार पडली.
या बैठकीस आमदार प्रशांत ठाकूर, आमदार महेश बालदी, विभागाचे प्रधान सचिव, पनवेल महापालिका आयुक्त गणेश देशमुख, ‘रायगड जिल्हा परिषद'चे मुख्याधिकारी डॉ. भरत बास्टेवाड, माजी उपमहापौर चारुशीला घरत, माजी नगरसेवक नितीन पाटील, माजी नगरसेवक प्रकाश बिनेदार, महापालिका उपायुक्त गणेश शेट्ये यांच्यासह इतर अधिकारी उपस्थित होते.
पनवेल महापालिका हद्दीत रायगड जिल्हा परिषदेच्या ५१ शाळा असून, या सर्व शाळांमध्ये पनवेल महापालिका हद्दीतील हजारो गरिब आणि गरजू विद्यार्थी-विद्यार्थिनी शिक्षण घेत आहेत. रायगड जिल्हा परिषद मार्फत राजिप शाळांची दुरुस्ती देखील गेल्या अनेक वर्षांपासून करण्यात आलेली नसल्यामुळे राजिप शाळा इमारती सद्यस्थितीत खूपच धोकादायक आणि नादुरुस्त अवस्थेत आहेत. तसेच सर्व शाळांची मालकी रायगड जिल्हा परिषदेकडे असल्यामुळे पनवेल महापालिका या शाळांची दुरुस्ती तांत्रिक दृष्ट्या करु शकत नाही.
शिक्षण घेणे, मुलभुत अधिकार असल्यामुळे सदर शाळेमध्ये शिक्षण घेत असलेल्या विद्यार्थ्यांच्या भविष्याचा विचार करता या शाळांमध्ये उत्तम दर्जाचे शिक्षण आणि त्यांना लागणाऱ्या सुविधा पुरविणे अत्यंत गरजेचे असून नादुरुस्त शाळा पनवेल महापालिकेकडे विनामोबदला हस्तांतर केल्यास महापालिका मार्फत सदर शाळांची दुरुस्ती किंवा नवीन बांधकाम करुन उत्कृष्ट दर्जाच्या शाळा उभारुन रायगड जिल्ह्यातील गोरगरिब विद्यार्थ्यांना शाळेचा लाभ घेणे शक्य होणार आहे, असे निदर्शनास आणून, ‘पनवेल महापालिका हद्दीतील सर्व रायगड जिल्हा परिषद शाळांचे हस्तांतर पनवेल महापालिकेकडे विनामोबदला करण्यात यावे', अशी मागणी आमदार प्रशांत ठाकूर यांनी निवेदनात केली होती.
या संदर्भात झालेल्या बैठकीतील चर्चेत ग्रामविकास मंत्री ना. गिरीष महाजन यांनी सकारात्मक प्रतिसाद देत पनवेल महापालिका हद्दीत येणाऱ्या रायगड जिल्हा परिषदेच्या सर्व शाळांचे पनवेल महापालिकेकडे हस्तांतरण करण्याचे आदेश संबंधित विभागाच्या अधिकाऱ्यांना दिले. या निर्णयामुळे राजिप शाळांना नवसंजीवनी मिळण्याबरोबर विद्यार्थी-विद्यार्थिनींना शिक्षण सुलभ आणि गुणवत्ता विकासाला चालना मिळणार आहे.
