नवी मुंबई महापालिका आयुक्त निवासस्थान पत्त्यावर १५० मतदारांची नोंद
आ. प्रशांत ठाकूर दाम्पत्याचा अवयव दान संकल्प!
सरकारी अभियानात ऑनलाईन नोंदणी
पनवेल : मानवता सर्वश्रेष्ठ धर्म आहे, असे सिध्द करणारी कृती म्हणजे अवयव दान. याच भावनेतून पनवेल मधील आमदार प्रशांत ठाकूर आणि त्यांच्या पत्नी सौ. वर्षा ठाकूर यांनी मरणोत्तर अवयव दानाचा संकल्प केला. त्यांनी केंद्र सरकारच्या अभियानामध्ये ऑनलाइन नोंदणी करुन एक आदर्श वस्तुपाठ ठेवला आहे. त्याचबरोबर इतरांना देखील अवयव दान करण्याचे आ. प्रशांत ठाकूर दाम्पत्याने आवाहन केले आहे.
मृत्यु मानवी आयुष्यातील कधीही न बदलता येणारे चिरंतन सत्य आहे. त्या अनुषंगाने आपण समाजातील अनेक गरजूंच्या आयुष्यात आनंद फुलवून त्यांचे जीवन प्रकाशमय करु शकतो, याची जाणीव फारच कमी लोकांना आहे. शरीर क्षणभंगूर आहे. मृत्यूनंतर सारे नष्ट होते. मात्र, अवयरुपी जिवंत रहायचे असेल तर ‘अवयव दान' सर्वात श्रेष्ठ पर्याय आहे. मृत्यूपश्चात एक देह सात जणांच्या आयुष्यात आशेचा किरण ठरु शकतो. तर ३५ लोकांच्या आयुष्याचा दर्जा सुधारु शकतो. मात्र, समाजात अवयव दानाविषयी फारशी जागृती नसल्याने कित्येक रुग्ण वर्षानुवर्ष प्रतिक्षेत आहेत. अवयव दान केवळ डोळे किंवा किडनी पुरते मर्यादित नसून, शरीराचे सुमारे १० विविध अवयव दान करता येतात. पण, त्याकरीता पुरेशी माहिती आणि इच्छाशक्ती नसते. त्यामुळे मरणोत्तर अवयव दानाचा संकल्प करण्यास फारसे कोणी पुढे येत नाही. मात्र, पनवेल विधानसभा मतदारसंघातील आमदार प्रशांत ठाकूर आणि त्यांच्या पत्नी सौ. वर्षा ठाकूर यांनी महत्वाचे पाऊल उचलत समाजापुढे आदर्श ठेवला आहे. आ. प्रशांत ठाकूर दाम्पत्याने भारत सरकारच्या pledge.mygov.in/organ-donation या अधिकृत संकेतस्थळावर जाऊन अवयव दानाची शपथ घेतली. मृत्यूनंतर देखील आपण इतरांच्या कामी येऊ शकतो, आपल्या एका कृतीमुळे दुसऱ्या व्यक्तीचे जीवन सुखकर करत त्याला नवीन जीवनदान देऊ शकतो, या भावनेतून आ. प्रशांत ठाकूर दांपत्याने पुढाकार घेतला आहे.
मातृभूमीच्या रक्षणासाठी भारत देशाच्या सीमेवर तैनात जवान स्वतःच्या प्राणांचे बलिदान देऊन हुतात्मा होतात. आज आरोग्य विज्ञानातील संशोधनामुळे एखादा सामान्य नागरिकही अवयव दानासारखे सर्वोच्च दान देऊन, मृत्यूनंतरही आपल्या अवयवांच्या रुपाने अमर होतो. मानवता सर्वश्रेष्ठ धर्म आहे, असे सिध्द करणारी कृती म्हणजे अवयव दान. आज मी आणि पत्नी सौ. वर्षा हिने भारत सरकारच्या pledge.mygov.in/organ-donation या अधिकृत संकेतस्थळावर जाऊन अवयव दानाची शपथ घेतली. मृत्यूनंतर देखील आपण इतरांच्या कामी येऊ शकतो, आपल्या एका कृतीमुळे दुसऱ्या व्यक्तीचे जीवन सुखकर करत त्याला नवीन जीवनदान देऊ शकतो, अशी भावना अतिशय सुखदायी आहे. आपण सर्वही या कृतीसाठी पुढे या, अवयव दानाची शपथ घ्या आणि इतरांनाही याबाबत माहिती द्या, असे आवाहन करीत आहे. - आमदार प्रशांत ठाकूर, पनवेल.
--
