‘सिडको'ची सदनिकांसह भूखंड विक्री योजना
४१५८ सदनिकांसह २४५ वाणिज्यिक गाळे, ६ कार्यालये-विविध वापरांसाठी भूखंड विक्रीस उपलब्ध
नवी मुंबई ः गणेश चतुर्थीच्या मुहूर्तावर ‘सिडको'च्या विविध गृहसंकुलांतील उपलब्ध ४१५८ घरांसोबतच २४५ वाणिज्यिक गाळे, रेल्वे स्थानक संकुलातील ६ कार्यालये त्याचप्रमाणे विविध वापरांसाठी भूखंड विक्रीच्या योजना ‘सिडको'ने जाहीर केल्या आहेत. यामुळे सर्वसामान्य नागरिकांसह व्यापारी, व्यावसायिक अशा समाजातील विविध घटकांचा गणेशोत्सवाचा आनंद निश्चितच द्विगुणीत होणार असल्याचे ‘सिडको'चे व्यवस्थापकीय संचालक डॉ. संजय मुखर्जी यांनी सांगितले.
सिडको सातत्याने घरे, भूखंड, दुकाने आणि कार्यालयांची (कमर्शियल प्रिमाईसेस) विविध योजनांद्वारे समाजातील सर्व घटकांना विक्री करते. ज्यामुळे शहराच्या आर्थिक विकासात मदत होण्यासोबतच नवी मुंबईच्या वाणिज्यिक क्षमता वृध्दींगत होऊन शहराच्या आर्थिक विकासासही हातभार लागतो. नागरिकांना गणेशोत्सवाच्या शुभेच्छा देताना या योजनांची घोषणा करुन व्यवस्थापकीय डॉ. संजय मुखर्जी यांनी नवी मुंबईत नागरिक, व्यापारी आणि विकासक यांना त्यांची घरे, कार्यालये, व्यावसायिक गाळ्यांची मालकी मिळण्याचा मार्ग मोकळा केला आहे.
दरम्यान, महागृहनिर्माण योजना अंतर्गत नवी मुंबईतील द्रोणागिरी, कळंबोली, तळोजा आणि खारघर नोडमधील ‘सिडको'च्या गृहसंकुलातील ४१५८ घरे विक्रीकरिता उपलब्ध करुन देण्यात आली आहेत. परवडणाऱ्या दरातील सदर ४१५८ घरांपैकी ४०४ घरे प्रधानमंत्री आवास योजना अंतर्ग आर्थिकदृष्ट्या दुर्बल घटकांकरिता आणि उर्वरित३७५४ घरे सर्वसाधारण प्रवर्गाकरिता उपलब्ध आहेत. प्रधानमंत्री आवास योजनेसाठी नवीन उत्पन्न मर्यादा ६ लाख रुपये तर अनुदानाची रक्कम २.५० लाख रुपये निश्चित करण्यात आली आहे.
नवी मुंबईतील विकसित नोडमध्ये आणि मोक्याच्या ठिकाणी सदर घरे असलेली गृहसंकुले वसलेली आहेत. या गृहसंकुलांना रस्ते, रेल्वे आणि ‘सिडको'च्या मेट्रो द्वारे उत्तम कनेक्टिव्हिटी लाभली असून आधुनिक सोयी-सुविधांनी परिपूर्ण असणाऱ्या या गृहसंकुलांच्या परिसरात शाळा, महाविद्यालये, रुग्णालये आदि सर्व सामाजिक सुविधाही उपलब्ध असल्याचे व्यवस्थापकीय संचालक डॉ. संजय मुखर्जी यांनी सांगितले.
त्याचप्रमाणे ‘सिडको'च्या खारघर, तळोजा, द्रोणागिरी, कळंबोली, खारघर आणि घणसोली गृहसंकुलातील एकूण २४५ वाणिज्यिक गाळेसुध्दा गणेशोत्सवाच्या निमित्ताने विक्रीकरिता उपलब्ध करण्यात आले आहेत. तसेच नेरुळ रेल्वे स्थानक संकुल आणि जुईनगर स्थानक संकुल येथील प्रत्येकी ३ याप्रमाणे एकूण ६ व्यावसायिक कार्यालये (कमर्शिअल प्रिमायसेस) आणि तारांकीत हॉटेलसाठी १, निवासी वापरासाठी ६४ तर निवासी तथा वाणिज्यिक वापरासाठी ५ भूखंड विक्रीकरीता उपलब्ध करुन देण्यात आले आहेत.
सदर योजनांच्या सविस्तर माहितीकरिता प्ूूज्ेः//ैैै.म्ग्म्द.स्ीप्ीीीेप्ूीी.ुदन्.ग्ह संकेतस्थळ उपलब्ध करुन देण्यात आले असून अर्ज नोंदणीपासून ते सोडती पर्यंतच्या सर्व प्रक्रिया ऑनलाईन प्रक्रियेद्वारे पार पडणार असल्याचे ‘सिडको'द्वारे कळविण्यात आले आहे.
