१४ ते १६ फेब्रुवारी दरम्यान पं. राम मराठे संगीत महोत्सव
ठाणे : ठाणे महापालिका तर्फे आयोजित करण्यात येणारा संगीतभूषण पं. राम मराठे संगीत महोत्सव यंदा १४ ते १६ फेब्रुवारी या काळात होणार आहे. या ‘महोत्सव'च्या पहिल्या दिवशी ज्येष्ठ हार्मोनियम वादक पं. विश्वनाथ कान्हेरे यांना राज्यस्तरीय तसेच गायिका वेदश्री खाडीलकर-ओक यांना युवा पुरस्काराने गौरविण्यात येणार आहे. या ‘संगीत महोत्सव'ला रसिकांनी भरभरून प्रतिसाद द्यावा, असे आवाहन महापालिका आयुक्त सौरभ राव यांनी केले आहे.
डॉ. काशिनाथ घाणेकर नाट्यगृह येथे तीन दिवस सदर महोत्सव होणार असून ‘महोत्सव'चे २९वे वर्ष आहे. महोत्सव विनामूल्य असून रसिकांनी कार्यक्रमांना भरभरुन प्रतिसाद द्यावा, असे आवाहन ठाणे महापालिका आणि पं. राम मराठे कुटुंबीय यांच्या वतीने करण्यात आले आहे. ‘संगीत महोत्सव'च्या प्रवेशिका पुढील आठवड्यात डॉ. घाणेकर नाट्यगृह आणि महापालिका मुख्यालय, पाचपाखाडी येथे उपलब्ध होणार आहेत.
याही वर्षी ‘महोत्सव'मध्ये नामवंत आणि ज्येष्ठ कलाकार तसेच नवोदित कलाकार यांचा सुरेल संगम रसिकांना अनुभवता येणार आहे. ‘महोत्सव'चा आरंभ १४ फेब्रुवारी रोजी सायंकाळी पं. राम मराठे यांची नात आणि युवा कलाकार प्राजक्ता मराठे-बिचोलकर यांच्या गायनाने होईल. त्यांना स्वप्नील भिसे आणि ज्ञानेश्वर सोनावणे साथ करणार आहेत. त्यानंतर, सौरव-गौरव मिश्रा यांची कथ्थक जुगलबंदी होईल. पाठोपाठ पं. राम मराठे स्मृती पुरस्कारांचा वितरण सोहळा होईल. पहिल्या दिवसाची सांगता ख्यातनाम ज्येष्ठ गायक पं. अजय पोहनकर यांच्या गायनाने होईल. त्यांना अजय जोगळेकर आणि ओजस अधिया साथ करणार आहेत.
१५ फेब्रुवारी रोजी दुपारी ४.३० वाजता जुई धायगुडे-पांडे यांच्या गायनाने आरंभ होईल. त्यांना स्वप्नील भिसे आणि सुप्रिया जोशी साथ करणार आहेत. त्यानंतर युवराज सोनार आणि सतेज करंदीकर यांची बासरी जुगलबंदी होईल. त्यांना तबलासाथ पं. कालिनाथ मिश्रा करणार आहेत. सायं. ६.३० वाजता पं. कैवल्यकुमार गुरव यांचे गायन होईल. त्यांना रोहीत देव आणि ज्ञानेश्वर सोनावणे साथसंगत करणार आहेत. त्यानंतर रात्री ८ वाजता सानिया पाटणकर यांचे गायन होईल. त्यांना मंदार पुराणिक आणि अभिनय रवांदे साथ करणार आहेत. तर त्या दिवसाची सांगता रात्री ९ वाजता पं. विभव नागेशकर यांच्या तबला वादनाने होईल.
