‘हिंदूहृदयसम्राट बाळासाहेब ठाकरे स्वच्छ, सुंदर बस स्थानक' अभियान
परिवहन मंत्री प्रताप सरनाईक यांची माहिती
मुंबई : स्व. बाळासाहेब ठाकरे यांच्या जयंतीनिमित्त २३ जानेवारी रोजी पुढील वर्षभर एसटीच्या राज्यभरातील सर्व बसस्थानकांवर उपमुख्यमंत्री एकनाथ शिंदे यांच्या संकल्पनेतून ‘हिंदूहृदयसम्राट बाळासाहेब ठाकरे स्वच्छ, सुंदर बस स्थानक' अभियान राबविण्यात येणार आहे. तब्बल ३ कोटी रुपयांची बक्षिसे या अभियान अंतर्गत देण्यात येणार असून राज्यात ‘अ' वर्गात पहिला येणाऱ्या बस स्थानकाला १ कोटीचे बक्षीस जाहीर करण्यात येत आहे, अशी घोषणा परिवहन मंत्री प्रताप सरनाईक यांनी केली आहे. या ‘अभियान'चा शुभारंभ २३ जानेवारी रोजी सकाळी ११ वाजता ना. सरनाईक यांच्याहस्ते कुर्ला नेहरुनगर बस स्थानकावर होणार आहे. यानिमित्ताने सर्व राज्यभर प्रत्येक बसस्थानकावर शालेय विद्यार्थी, सामाजिक संस्था आणि एसटी कर्मचाऱ्यांच्या सहकार्यातून सखोल स्वच्छता मोहीम राबविण्यात येणार आहे.
मागील वर्षी सदर अभियान सुरु करताना उपमुख्यमंत्री एकनाथ शिंदे यांनी या ‘अभियान'ची संकल्पना विषद करताना, सर्वसामान्य प्रवाशांना स्वच्छ-सुंदर बस स्थानक तसेच निर्जंतुक, टापटीप प्रसाधनगृहे कायमस्वरुपी उपलब्ध करुन देणे एसटी महामंडळाचे प्रथम कर्तव्य आहे. या जाणिवेतून सदर अभियान सुरू करण्यात येत आहे, असे स्पष्ट केले होते.
तसेच ‘आपलं गाव, आपलं बस स्थानक' या संकल्पनेवर आधारित लोकसहभागातून बस स्थानकांचा सर्वांगीण विकास करणे या ‘अभियान'चा मुख्य ‘गाभा' राहणार असल्याचेही आवजर्ुन सांगितले होते. अर्थात कोणतेही बस स्थानक त्या गावचे मध्यवर्ती ठिकाण असते. त्याअर्थाने बस स्थानक त्या गावची ‘शान' असल्यामुळे गावातील तरुण मंडळे, महिला बचत गट, विविध सामाजिक संस्था, उद्योग समूह यांनी पुढे येऊन त्या बस स्थानकाचे सुशोभिकरण आणि सौंदर्यीकरणासाठी मदत करावी, असे आवाहन ना. प्रताप सरनाईक यांनी केले आहे.
वर्षभर चालणाऱ्या या ‘अभियान'मध्ये दर ३ महिन्यांनी प्रत्येक बस स्थानकाचे मूल्यमापन होणार आहे. त्यासाठी ‘एसटी'च्या वरिष्ठ अधिकाऱ्यांच्या नेतृत्वाखाली परीक्षण समित्या नेमण्यात आल्या असून त्यांनी दिलेल्या गुणांच्या आधारे सरासरीद्वारे बस स्थानकाचे क्रमांक निश्चित करण्यात येतील. राज्यभरात ‘एसटी'च्या असलेल्या सर्व बस स्थानकाचे तेथील प्रवासी चढ-उतार संख्येच्या आधारे शहरी ‘अ' वर्ग, निमशहरी ‘ब' वर्ग आणि ग्रामीण ‘क' वर्ग अशा तीन गटांमध्ये विभागणी केलेली आहे. प्रथम प्रादेशिक स्तरावर प्रत्येक गटनिहाय पहिला, दुसरा आणि तिसऱ्या क्रमांकासाठी स्पर्धा रंगणार असून अंतिम स्पर्धा राज्यस्तरावर घ्ोण्यात येईल. त्यासाठी प्रत्येक प्रादेशिक स्तरावर गटनिहाय पहिला आलेल्या बस स्थानकाचा विचार केला जाणार आहे. राज्यपातळीवर ‘अ' वर्ग गटातून पहिला येणाऱ्या बस स्थानकाला १ कोटी रुपये ‘ब' वर्ग गटातून पहिला येणाऱ्या बस स्थानकाला ५० लाख रुपये तर ‘क' वर्ग गटातून पहिला येणाऱ्या बस स्थानकाला २५ लाख रुपये इतक्या रवकमेची बक्षिसे देण्यात येणार आहेत.
