लोकल प्रवाशांनी गिरविले सीपीआर तंत्राचे धडे
खारघर : हल्लीच्या धकाधकीच्या जीवनात हृदयविकारांच्या घटनांमध्ये मोठ्या प्रमाणात वाढ होत आहे. अनेकदा हृदयाचा झटका इतक्या वेगात येतो की त्यात मृत्यू ओढवतो. मात्र, या अशा प्रसंगात हॉस्पिटलमध्ये पोहोचेपर्यंत जर काही प्राथमिक उपचार मिळाले तर काहीवेळा प्राण वाचण्यास मदत होते. अशावेळी हृदयरोगावर गेमचेंजर ठरलेला उपाय म्हणजे कार्डिओ पल्मोनरी रिसुसिटेशन (सीपीआर). या उपायाने अनेकांचे प्राण वाचले आहेत.
जागतिक हृदय दिनानिमित्त, खारघर येथील मेडिकवर हॉस्पिटल्सने खारघर तसेच पनवेल रेल्वे स्थानकांवर कार्डिओपल्मोनरी रिसुसिटेशनचे (सीपीआर) एक तासाचे प्रशिक्षण सत्र आयोजित केले होते. यामध्ये रेल्वे स्थानकावरील प्रवाशांना सीपीआरचे प्रशिक्षण देण्यात आले.
भारतात हृदय आणि रक्तवाहिन्यासंबंधीच्या आजाराचे प्रमाण वाढत आहे, ज्याचा परिणाम केवळ प्रौढावरच नाही तर तरुणांवरही होत आहे. शारीरिक हालचालींचा अभाव, आनुवंशिकता, धुम्रपानाची वाईट सवय, आहाराच्या चुकीच्या सवयी आणि ताण-तणाव, अति व्यायाम, लठ्ठपणा, उच्च रक्तदाब, उच्च कोलेस्टेरॉल, मद्यपान, चरबीयुक्त पदार्थांचे सेवन यासारखे अनेक घटक हृदयरोगास कारणीभूत ठरतात. तरुणांमध्ये अचानक हृदयविकाराचा झटका येणे, यासारख्या घटनांमध्ये होणारी वाढ चिंताजनक आहे. मुंबईची लाइफ लाईन म्हणून ओळखल्या जाणाऱ्या लोकल ट्रेन मधून दरदिवशी लाखो प्रवाशी प्रवास करतात. हीच बाब ओळखून खारघर येथील मेडिकवर हॉस्पिटल्स मधील अपघात आणि आपत्कालीन विभागाचे प्रमुख डॉ. अभिजीत सावंत यांच्या नेतृत्वाखाली खारघर, पनवेल या गर्दीच्या रेल्वे स्थानकांवर सीपीआर तंत्राविषयी माहिती आणि प्रशिक्षण देण्यात आले.
दरम्यान, हृदयविकाराच्या झटक्यादरम्यान केले जाणारे सीपीआर जगण्याची शक्यता वाढवते. सर्वसामान्य नागरिकांना सीपीआर येणे गरजेचे असल्याचे मत वैद्यकीय क्षेत्रातील तज्ञांनी व्यक्त केले आहे. त्यासाठी गोल्डन अवर मध्ये उपचार आवश्यक आहेत. गोल्डन अवर म्हणजे हृदयाचा झटका आल्यानंतर तत्काळ जे प्रथमोचार ज्या वेळेत रुग्णांना मिळतात, त्या वेळेला गोल्डन अवर म्हणतात. अनेक व्यक्तींना या वेळेत सीपीआर दिल्यामुळे रुग्ण बचावल्याच्या अनेक घटनांची नोंद हृदयरोग तज्ञांकडे आहे. सदर ठिकाणी प्रवाशांना देण्यात आलेल्या प्रशिक्षण सत्रात हृदयविकाराची लक्षणे, उपचार आणि प्रतिबंध यासंबंधी देखील माहिती देण्यात आली, असे रुग्णालयाचे इंटरव्हेंशनल कार्डिओलॉजिस्ट डॉ. तमिरुद्दीन दानवडे यांनी सांगितले.
