घणसोली मधील अनधिकृत झोपड्या जमीनदोस्त
नवी मुंबई : नवी मुंबई महापालिका आयुक्त डॉ.कैलास शिंदे यांच्या निर्देशानुसार आणि उप आयुक्त (अतिक्रमण) डॉ.राहुल गेठे यांच्या मार्गदर्शनानुसार महापालिका अतिक्रमण विभागाद्वारे घणसोली सेवटर-१५ मध्ये उभारण्यात आलेल्या २५ अनधिकृत झोपड्या जमीनदोस्त करण्याची कारवाई २९ मे रोजी करण्यात आली.
नवी मुंबई महापालिका घणसोली विभाग कार्यालय क्षेत्रात घणसोली सेवटर-१५ मधील पामबीच रोड लगत साईबाबा मंदिर जवळील मोकळया जागेवर विनापरवानगी अनधिकृतपणे साधारणतः २५ पत्र्याच्या झोपडयांची उभारणी करण्यात आली होती. या अवैधरित्या उभारण्यात आलेल्या सर्व झोपडया महापालिका आयुक्त डॉ.कैलास शिंदे यांच्या निर्देशानुसार घणसोली विभाग कार्यालय अतिक्रमण विभाग तर्फे निष्कासित करण्यात आल्या आहेत.
सदर धडक मोहिम महापालिका उपआयुक्त (अतिक्रमण विभाग) डॉ. राहुल गेठे यांच्या नियंत्रणाखाली, घणसोली विभाग अधिकारी संजय तायडे यांनी घणसोली विभाग कार्यालयातील अधिकारी-कर्मचारी यांच्या सहयोगाने राबविली.
दरम्यान, महापालिका कार्यक्षेत्रात उभारण्यात आलेली अनधिकृत बांधकामे निष्कासित करण्याची कारवाई यापुढे अधिक तीव्र करण्यात येणार आहे, असे महापालिका उप आयुक्त (अतिक्रमण) डॉ. राहुल गेठे यांनी सांगितले.
